Orbazai (Lugo), primeiros de Maio de 2011.
Velaí vén o maio de flores cubertas...
Aproveitando que o mes de maio é unha explosión de colorido, vida e natureza en estado puro, no que un simple prado pode facer as delicias dun paseante polo seu verde intenso, tamén en Orbazai queremos aproveitar ese apoteósico florecemento da primavera para inaugurar este blog!
Porque tamén nós florecemos...
E aínda máis: ao igual que a explosión de vida deste mes é un cúmulo de cousas -as flores, o canto do cuco e a paisaxe en xeral- que ten a súa última expresión nos maios, tamén a nosa música tradicional (encabezada polo verde-esperanza de Airiños de Orbazai) relocirá na Foliada que andamos argallando na nosa parroquia para o próximo 4 de XUÑO cos grupos: Trío Lugués, Reviralvolta, Pena do Golpe, Arrincadeira, Caivanca, Penas de Rodas e Airiños de Orbazai.
Así que, á vista dos vindeiros acontecementos, mellor cá cos versos de Curros, eu quedaría con aqueles dunha cantiga popular que rezaban: “velaí vén o maio cargado de flores; detrás ven San Xoán que as trae mellores”.
Agardamos pois ansiosos os primeiros días do mes de S. Xoán e acolléndonos a aquelo de que "a flor sempre se terá como insignia de vida, porque no ciclo será froito e novamente semente", matizamos nesta nosa paleta de cores o verde de Airiños, como cor da esperanza e da ilusión...porque, a pesares de que sabemos que non se debe, a veces comezamos a casa polo tellado.
Alomenos teremos onde resgardarnos, e xa con isto....que chova!
E...Ei Carballeira! Mais disto falaremos noutro momento.
